Félagslög fyrir BIM Ísland

Samþykkt á aðalfundi félagsins í Reykjavík 16. mars 2026

HEITI OG AÐSETUR 
1.gr.
Félagið heitir BIM Ísland.
Aðsetur félagsins er Reykjavík.

TILGANGUR OG MARKMIÐ
2. gr.
Tilgangur félagsins er að vera leiðandi samráðsvettvangur í þróun, innleiðingu, stöðlun og nýsköpun á BIM í mannvirkjagerð sem og að reka landseiningu (chapter) fyrir buildingSMART International á Íslandi.

Markmið félagsins er að hvetja til stöðugra umbóta og nýsköpunar í notkun BIM til aukinna gæða mannvirkja, hagræðingar á líftíma þeirra og betri nýtingar auðlinda. Jafnframt að framfylgja markmiðum og stefnu buildingSMART International á Íslandi.

Að auki stefnir félagið að aukinni vitund og menntun á sviði BIM meðal fagfólks og almennings.

AÐILD 
3. gr.
Umsóknum um aðild skal beina til stjórnar og skal umsóknaraðild afgreidd á stjórnarfundi. Aðilar skulu greiða árgjald fyrir 1. mars ár hvert.

Stjórn félagsins ákvarðar og kynnir árgjald við upphaf hvers árs. Við ákvörðun skal stjórnin taka mið af almennri verðlagsþróun og fjárhagsstöðu félagsins og gæta jafnræðis milli aðildarflokka.
Árgjald er í eftirfarandi flokkum:

• Einyrkjaaðild
• Aðild minni fyrirtækja, færri en 8 starfsmenn
• Aðild stærri fyrirtækja, 8 eða fleiri starfsmenn
• Aðild menntastofnana (1)
• Styrktaraðild (2)

(1) Menntastofnanir greiða ekki árgjald
(2) Styrktaraðilar njóta aukins sýnileika í útgefnu efni og á viðburðum BIM Ísland, og hafa jafnframt heimild til að nota merki „buildingSMART Chapter Sponsor“ í eigin kynningarefni.

Aðilar skulu tilkynna stjórn félagsins skriflega um úrsögn fyrir 1. febrúar ár hvert.

AÐALFUNDUR
4. gr.
Æðsta vald í málefnum félagsins hefur aðalfundur.

Aðalfund félagsins skal halda fyrir 1. maí ár hvert og boðar stjórn félagsins til hans með minnst 14 daga fyrirvara. Aðalfundur er löglegur ef löglega er til hans boðað.

Aðildarfélögum, sem hafa staðið skil á greiðslum árgjalda við upphaf aðalfundar, er heimilt að skipa einn aðalfundarfulltrúa hvert, sem hefur umboð til fullnaðarafgreiðslu þeirra mála sem fyrir aðalfund liggja, enda hafi þeirra verið getið samkvæmt boðaðri dagskrá aðalfundar. Hver aðalfundarfulltrúi fer með eitt atkvæði.
Aðalfundi stýrir kjörinn fundarstjóri. Einnig skal kosinn ritari fundarins.

Dagskrá aðalfundar skal vera sem hér segir:
1. Kosning fundarstjóra og fundarritara
2. Skýrsla stjórnar um störf félagsins á liðnu ári.
3. Reikningar lagðir fram til samþykktar
4. Lagabreytingar
5. Aðildargjöld
6. Kosning stjórnar og skoðunarmanna
7. Önnur mál

Auka aðalfund skal halda ef aðildarfélög með 2/3 skráðs atkvæðamagns óska þess. Einnig ef þrír stjórnarmenn krefjast þess.

STJÓRN
5.gr.
Stjórn félagsins skal skipuð 9 einstaklingum, formanni og átta meðstjórnendum, kjörnum á aðalfundi. Formaður er kosinn sérstaklega til tveggja ára í senn og getur að hámarki setið samfellt sem formaður í fjögur starfsár. Aðrir stjórnarmenn eru kosnir til tveggja ára. Við fyrstu stjórnarkjör eftir gildistöku þessarar greinar skulu fjórir meðstjórnendur kjörnir til eins árs og fjórir til tveggja ára, en eftir það skulu á hverjum aðalfundi kjörnir fjórir meðstjórnendur til tveggja ára. Segi stjórnarmaður sig úr stjórn eða láti af stjórnarstörfum áður en kjörtímabili lýkur skal á næsta aðalfundi kjósa í sæti hans til þess tíma sem eftir er af kjörtímabilinu, þannig að skipting kjörtímabila haldist sem best. Stjórnin kýs varaformann og gjaldkera úr sínum hópi og tekur varaformaður sæti formanns ef formannssæti losnar á kjörtímabili. Stjórnin getur starfað þótt sæti í stjórn séu laus, enda séu þó að minnsta kosti fimm stjórnarmenn.

Kjörgengir til stjórnar eru aðeins starfsmenn aðildarfélaga og einyrkjaaðilar skv. 3. gr., enda séu þeir ekki starfsmenn félagsins skv. 7. gr. Frá hverju aðildarfélagi getur aðeins einn starfsmaður verið kjörgengur til stjórnar á hverjum tíma. Sitji starfsmaður aðildarfélags þegar í stjórn á óloknu kjörtímabili eru aðrir starfsmenn þess aðildarfélags ekki kjörgengir fyrr en kjörtímabili hans lýkur.

Framboð til stjórnar, þar með talið til formanns, skulu berast stjórn félagsins skriflega eigi síðar en 7 dögum fyrir aðalfund. Stjórn skal kynna móttekin framboð fyrir aðildarfélögum eigi síðar en 2 dögum fyrir aðalfund. Berist færri framboð en þau sæti sem kjósa skal í er heimilt aðalfundi að taka við frekari framboðum á fundinum sjálfum.
Séu frambjóðendur til stjórnar fleiri en þau sæti sem kjósa skal í skal kosning fara fram skriflega, þar með talið með rafrænum hætti. Hver aðalfundarfulltrúi má á kjörseðli merkja við allt að jafnmarga frambjóðendur og þau sæti sem kjósa skal í, og telst kjörseðill ógildur hafi verið merkt við fleiri. Kjörnir teljast þeir frambjóðendur sem flest atkvæði hljóta, með þeirri takmörkun að aðeins einn starfsmaður hvers aðildarfélags geti hlotið kjör í stjórn; hljóti tveir eða fleiri starfsmenn sama aðildarfélags næg atkvæði til kjörs telst kjörinn sá þeirra sem flest atkvæði hlýtur. Falli atkvæði á jöfnu um síðasta sæti skal varpa hlutkesti.

Séu frambjóðendur jafnmargir eða færri en sæti sem kjósa skal í má aðalfundur samþykkja þá í einu lagi án skriflegrar kosningar.

Stjórn fer með málefni félagsins milli aðalfunda og sér um að starfsemi þess sé í samræmi við tilgang skv. 2. gr. Hún fer jafnframt með yfirstjórn landseiningar félagsins, buildingSMART Iceland, og tryggir samstarf og samræmingu við buildingSMART International. Formaður, varaformaður og gjaldkeri gegna samsvarandi hlutverkum fyrir buildingSMART Iceland (chairman, vice-chairman, finance contact).

Undirskrift meirihluta sitjandi stjórnarmanna skuldbindur félagið. Stjórnin veitir prókúruumboð fyrir félagið.

STJÓRNARFUNDIR
6. gr.
Formaður stjórnar boðar til stjórnarfunda.  Hver stjórnarmaður getur krafist stjórnarfundar.  Stjórnin skal setja sér starfsreglur þar sem nánar er kveðið á um framkvæmd starfa hennar.
Stjórnarfundir eru lögmætir ef meirihluti fullskipaðrar stjórnar sækir fund. Mikilvæga ákvörðun má þó ekki taka án þess að allir stjórnarmenn hafi haft tök á að fjalla um málið, sé þess nokkur kostur. Stjórnarmenn hafa jafnt atkvæðavægi á stjórnarfundi. Halda skal fundargerð um það sem gerist á stjórnarfundum.

STARFSMENN
7. gr.
Stjórn félagsins er heimilt að ráða starfsmenn félagsins telji hún þess þörf.  Stjórn setur starfsmönnum starfsreglur og ákveður starfskjör hans. Starfsmenn skulu ekki sitja í stjórn félagsins. Stjórn félagsins segir starfsmönnum upp störfum.

VERKEFNI
8. gr.
Stjórn hefur heimild til að leita til sérfræðinga við úrlausn ákveðinna verkefna.

Stjórn hefur einnig heimild til að veita sérfræðingum utan stjórnar umboð til að sinna verkefnum á vegum buildingSMART International, séu verkefnin til þess fallin.

SKOÐUNARMENN REIKNINGA
9. gr.
Á aðalfundi  félagsins skal kjósa tvo skoðunarmenn reikninga til að endurskoða reikninga félagsins fyrir hvert starfsár og leggja fyrir aðalfund. Skoðunarmenn má ekki kjósa úr hópi stjórnarmanna eða starfsmanna félagsins.

REIKNINGSÁRIÐ
10. gr.
Starfsár og reikningsár félagsins er frá 1. janúar til 31. desember. Stjórnin skal hafa lokið gerð ársreiknings og lagt hann fyrir skoðunarmenn eigi síðar en 31. mars ár hvert.

TEKJUR OG HAGNAÐUR
11. gr.
Aðildarfélög gera ekki arðsemiskröfu til félagsins. Verði hagnaður af rekstri félagsins skal honum varið til þeirra verkefna er greinir í 2. gr. samþykkta félagsins.  Hagnað og tap má flytja milli ára.

Tekjur félagsins skulu samanstanda af:
• árgjöldum aðildarfélaga
• ýmsum öðrum framlögum og styrkjum
• ráðstefnu- og námskeiðshaldi

LAGABREYTINGAR OG GILDISTAKA
12. gr.
Breytingar á lögum félagsins skulu bornar upp til samþykktar á löglega boðuðum aðalfundi og samþykkja með 2/3 hluta greiddra atkvæða. Tillögur að lagabreytingum skulu liggja fyrir og kynntar aðilum a.m.k. tveimur dögum fyrir aðalfund eða aukaaðalfund.

13. gr.
Félaginu verður því  aðeins slitið, að félagsslitin séu samþykkt á sama hátt og gildir um lagabreytingar.

Við slit og skipti félagsins skal verja eignum félagsins til hliðstæðra verkefna og tilgreind eru í 2. gr. eftir nánari ákvörðun aðalfundar.

15. gr.
Lög þessi öðlast gildi frá og með 17. mars 2026.